旅游资讯 专题 人文地理 图说香格里拉 摄影俱乐部 景点景区 民风民俗 特色美食 旅游贴士
དབུ་ཤོག > ཡུལ་སྲོལ་གོམས་གཤིས། > ནང་དོན་དངོས་གཞི།
ཁམས་རྒྱལ་ཐང་གི་གླུ་མ་བཅིངས་འགྲོལ་སྒྲོལ་མ།
དུས་ཚོད།:2015-10-26 09:40:29   རྩོམ་ཁུངས།:སེམས་ཀྱི་ཉི་ཟླའི་བོད་ཡིག་དྲ་བ།

ས་ལ་གཡང་ཆགས་ཤིང་མི་ནི་དཔའ་མཛངས་ལྡན་པའི་ཁམས་རྒྱལ་ཐང་གནའ་གྲོང་རིང་མོའི་གཏེར་ལུང་གཡང་ལྡན་ཕྱུག་མོ་ཞེས་གྲགས་པའི་ས་ཆ་དེ་རུ།  འགྲོ་འདུག་ལ་རང་ཚུགས་ལྡན་ཞིང་ལས་ཀ་ལ་ཕུགས་འདུན་ཡོད་པའི་བུ་མོ་ཆུང་ཆུང་ཞིག་གིས་ཡུལ་སྡེའི་རྒན་རབས་དག་གི་དྲུང་དུ་ཇི་ཞིག་ལ་སྦྱོང་འདོད་དང་གང་ཞིག་ཤེས་འདོད་ཀྱིས་སྤྱང་དྲུང་གཉིས་ལྡན་གྱི་མིག་ཟུང་ཧྲིག་ཧྲིག་ངང་།  རྣ་བ་ཀྲོང་ཀྲོང་ངང་ཧ་ཅང་གཟབ་ནན་གྱིས་དམངས་ཁྲོད་ཀྱི་གླུ་གཞས་དང་དབྱངས་རྟ། མེས་པོའི་གཏམ་རྒྱུད།གནའ་སྒྲུང་སོགས་ལ་ཉན་ཞིང་། དམངས་ཁྲོད་ཀྱི་གླུ་གཞས་རེ་རེ་དབྱངས་ལ་བཀུག་ཅིང་ངག་ལ་བསྐྱོར་ཏེ་དྲི་མས་མ་གོས་པའི་བྱིས་བློའི་སེམས་པས་དེ་དག་ལ་དུངས་ཞེན་དང་མཚར་སྣང་ཞིག་ཀྱང་ངང་གིས་སྐྱེས། བུ་མོ་ཆུང་ཆུང་དེའི་མིང་ལ་ཀརྨ་བཅིངས་འགྲོལ་སྒྲོལ་མ་ཞེས་ཐོགས་ཤིང་མི་རབས་ནས་མི་རབས་བརྒྱུད་པའི་ཡུལ་སྡེའི་ལོ་རྒྱུས་དང་། མེས་པོ་གོང་མ་རྣམས་ཀྱི་བློ་རིག་ལས་འཁྲུངས་པའི་ལ་གླུ་དང་མཛའ་གཞས།  ངལ་རྩོལ་གྱི་གཞས་སོགས་དམངས་ཁྲོད་རིག་གནས་ཀྱིས་ཁོ་མོར་ཤུགས་རྐྱེན་ཐེབས་ཤིང་མི་ཚེའི་བཤུལ་ལམ་རིང་མོར་སྒྱུ་རྩལ་གྱི་ཞིང་ས་ནས་འཚོལ་སྙེག་གི་གོམ་སྟབས་གླུ་དབྱངས་ལ་ཕྱོགས་པའི་རྟེན་འབྲེལ་གྱི་ཐོག་མའང་དེ་ནས་འགྲིག་པ་ལོས་ཡིན།

        དམངས་ཁྲོད་གླུ་ངག་གི་དབྱངས་རྟས་ཁོ་མོའི་ངག་སྙན་མོར་གྲོགས་སུ་བསྡོངས་ཤིང་། ཡུལ་སྡེ་བའི་གར་རྩེན་གྱི་སྟངས་སྟབས་དེ་ཁོ་མོའི་ལུས་ཟོར་ལྡེམ་མྱུར་གྱི་དཔལ་དུ་འཁྱུད་ཅིང་རང་ལོ་དགུ་ལ་ལོན་སྐབས་སྡེ་བའི་སློབ་གྲྭར་ཞུགས་ཤིང་།  ལྷན་སྐྱེས་སུ་གྲུབ་པའི་སྐད་ངག་སྙན་མོ་དེས་སློབ་གྲྭའི་ར་བ་ནས་ལ་གླུ་སོགས་དམངས་ཁྲོད་ཀྱི་གླུ་དབྱངས་ཁག་ཅིག་ངག་ལ་གྱེར་བས་དགེ་སློབ་ཀུན་ཧ་ལས་ཤིང་ངོ་མཚར་བར་གྱུར།  གླུ་གར་སྒྱུ་རྩལ་ལ་དུངས་ཞེན་དང་སྤྲོ་སྣང་ནི་ཁོ་མོའི་གཤིས་རྒྱུད་དུ་མ་བཅོས་རང་བྱུང་གིས་གྲུབ་པས།  རྒྱུན་པར་དགེ་རྒན་དང་སློབ་གྲོགས་ཚོར་ཁོ་མོའི་མགྲིན་པའི་སྐད་ངག་སྙན་མོས་སྤྲོ་བ་བསྐྱེད་ཅིང་ལྡེམ་མྱུར་གར་གྱི་སྟངས་སྟབས་ཀྱིས་དགའ་བ་བསྩལ་མྱོང་ཡོད།བཀའ་དྲིན་ཅན་གྱི་དགེ་རྒན་དེ་དག་གིས་ཁོ་མོའི་ལྷན་སྐྱེས་ཀྱི་སྐད་ངག་སྙན་མོ་དང་སློབ་སྦྱོང་ལ་སྡུག་རུས་ཆེ་བའི་རྣམ་པ་མཐོང་སྟེ་སྐུལ་ལྕག་དང་རེ་བཅོལ་གང་མང་གནང་བས་ཁོ་མོས་གླུ་གར་སྒྱུ་རྩལ་ལ་གཏད་པའི་ཕུགས་ཀྱི་འདུན་མ་དེ་རུ་སྔར་ལས་ལྷག་པའི་ཡིད་ཆེས་དང་སྙིང་སྟོབས་ཀྱིས་ཀུན་ནས་བརྟས།
        དེ་ལྟར་ལོ་ཡི་འཁོར་མོ་རིམ་གྱིས་འདས་ཏེ་ཁོ་མོའི་རང་ལོ་བཅུ་དྲུག་གི་ལང་ཚོས་རིག་པའི་བདུད་རྩིར་ཚིམས་མེད་དུ་རོལ་བའི་ཉིན་ཞིག་ལ་ཡུན་ནན་དམག་ཁུལ་གྱིས་གླུ་གར་བ་བསྡུ་བའི་བརྡ་ཐོ་ཞིག་སློབ་གྲྭར་འབྱོར་བྱུང་།   དེ་ནི་ཁོ་མོར་མཚོན་ན་མི་ཚེའི་འདུན་མ་མངོན་དུ་འགྱུར་བའི་སྔོན་འགྲོའི་ཆ་རྐྱེན་ཐོག་མ་དེ་ལོས་ཡིན།  ཁོ་མོའི་སེམས་སུ་དམག་ལ་ཞུགས་ན་ཚེ་གཅིག་ལ་དམག་མི་བྱེད་དགོས་པའི་ངེས་པ་མི་འདུག་ལ་གཙོ་བོ་རང་ལ་སློབ་སྦྱོང་གི་གོ་སྐབས་བཟང་པོ་ཞིག་ཐོབ་ན་དེ་རེད་འདོད་དེ་རང་ཐག་རང་གིས་བཅད་ནས་རྒྱལ་ཐང་རྫོང་མཁར་དུ་ཕྱིན་ཏེ་ངོ་རྒྱུགས་ལ་ཞུགས།  ངོ་རྒྱུགས་ཀྱི་སྐབས་སུ་ཁོ་མོས་ཕ་ཡུལ་གཏེར་ལུང་གི་རྒན་རབས་དག་གི་དྲུང་ནས་སྦྱོང་བའི་ཁྱད་ཆོས་ལྡན་པའི་དམངས་གཞས་ཤིག་ངག་ལ་གྱེར་པས་དེར་འདུས་ཀྱི་རྒྱུགས་ལེན་པ་དང་སྐར་འགོད་པ་སོགས་ཧ་ལས་ཏེ་དུས་ཐོག་ཏུ་དམག་ཁུལ་དུ་བསྡུ་ལེན་བྱེད་རྒྱུའི་གྲོས་ཐག་བཅད། དེ་ནི་ཁོ་མོར་མཚོན་ན་འདོད་ཐོག་ཏུ་རྟ་རྒྱུག་པ་དང་དུས་ཐོག་ཏུ་ཆར་བབས་པ་ཡིན་པས་འཚོལ་སྙེག་གི་གོམ་སྟབས་སྔར་ལས་བརྟན་པར་གྱུར་བ་རེད།

        དམག་ཁུལ་གྱི་སྒྲིག་ལམ་ནི་དམ་ཞིང་བཙན་པོ་ཡིན་པས་ཁོ་མོ་ནི་སྔར་ལས་ཀྱང་བློ་སྤོབས་ཅན་དང་སྒེར་ཚུགས་ཅན་དུ་བཏང་བ་རེད།  དམག་ཁུལ་དེ་ནས་དེང་རབས་ཀྱི་གླུ་དབྱངས་དང་།  གར་གྱི་སྟངས་སྟབས་སོགས་ལ་སྡུག་རུས་ཀྱིས་སྦྱོང་བ་མི་དམན་པ་བྱས་པས་འབྲས་བུ་ཡང་ཕུན་སུམ་ཚོགས་པར་སྨིན་བྱུང་། དེ་ནས་གོང་རིམ་དབུ་ཁྲིད་དག་གིས་ཁོ་མོ་བོད་ལྗོངས་དང་། སི་ཁྲོན།  ཞིན་ཅིང་སོགས་ཕྱོགས་མང་པོའི་དམག་ཁུལ་དུ་གླུ་གར་འཁྲབ་སྟོན་ལ་མངགས་པས། ཁོ་མོས་གླུ་གར་གྱི་སྟེགས་བུ་རེ་རེ་ནས་ཕ་ཡུལ་གྱི་དམངས་གླུ་དང་། དུས་དར་གྱི་གླུ་དབྱངས་རེ་རེ་ངག་ལ་གྱེར་བས་དེར་འདུས་ཀྱི་ལྟད་མོ་བ་ཚང་མས་བསྟོད་པའི་མཐེ་བོང་བསྒྲེངས་ཤིང་གླུ་མ་མིང་གྲགས་ཅན་ཞིག་ཏུ་འགྱུར་བའི་མགོ་བརྩམས་པ་རེད། ཁོ་མོས་སྔར་བཞིན་སྦྱང་བརྩོན་གྱི་གོམ་སྟབས་མ་ལྷོད་པར་ཕ་ཡུལ་གྱི་དམངས་གླུ་ལ་སྦྱོང་བ་བྱས་པའི་དན་རྟགས་སུ་སྤྱི་ལོ2004ལོར་ཕ་ཡུལ་གྱི་དམངས་གླུའི་དབྱངས་རྟ་གཙོ་བོ་བྱས་པའི་ཕ་སྐད་རྐྱང་རྐྱང་གི་ཟེར་སྡེར་ཐོག་མ༼ ཕ་ཡུལ་གྱི་སྙན་གཞས ༽ཞེས་པ་དེམདང་།༼ གླུ་གར་འཁྲབ་བཞིན་འོང ༽ཞེས་པའི་ཟེར་སྡེར་གཉིས་སྔ་ཕྱིར་འགྲེམ་སྤེལ་བྱས་པས་བོད་ཁམས་ཡོངས་སུ་དགའ་བསུ་ཚད་མེད་ཐོབ་ཡོད་པ་དང་།  ཁོ་མོས་ཕ་ཡུལ་གྱི་ལ་གཞས་དང་མཛའ་གཞས་སོགས་དམངས་ཁྲོད་རིག་གནས་ལ་དུངས་ཞེན་སྔར་ལས་ཆེ་བར་གྱུར་ཏེ་བོད་ཀྱི་ས་གནས་མང་པོར་དམངས་ཁྲོད་ཀྱི་གླུ་གཞས་དང་དབྱངས་རྟ་སོགས་སྔོག་འདོན་དང་དར་སྤེལ་བྱ་རྒྱུའི་ཀུན་སློང་གཙང་མའི་སེམས་ཤུགས་ཤིག་འཁྲུངས། 
        ལོ་དེར་རྒྱལ་ཡོངས་གྲངས་ཉུང་མི་རིགས་ཀྱི༼དམངས་གཞས་འགྲན་བསྡུར༽ལས་གསེར་གྱི་རྟགས་མའི་བྱ་དགའ་ཐོབ་པ་དང་། རྒྱལ་ཡོངས་མི་རིགས་ཀྱི་མཛངས་མའི་འགྲན་བསྡུར་དུ༼བོད་ཀྱི་མཛངས་མ༽ཞེས་པའི་གཟེངས་རྟགས་ཐོབ་པས་གླུ་མ་བཅིངས་འགྲོལ་སྒྲོལ་མ་ཞེས་མིང་གི་སྙན་པའང་རྒྱལ་ཡོངས་ས་གཞི་འཛིན་མའི་རི་ལུང་ཀུན་དུ་ཁྱབ།ཁོ་མོས་དེ་ཙམ་གྱི་ཆོ་ལོས་ཆོག་ཤེས་མི་འཛིན་པར་སྔར་གྱི་ཕུགས་འདུན་དང་རེ་སྙེག་ལ་བརྩོན་པའི་རྒྱུན་མཐུད་དེ་ཡུན་ནན་དམག་ཁུལ་ནས་ཕྱིར་བུད་བྱས་ཏེ་དམངས་ཁྲོད་ཀྱི་གླུ་གཞས་དང་དབྱངས་རྟ་འཚོལ་སྡུད་ཀྱི་བྱ་གཞག་གི་འགོ་བརྩམས།   ཕྱོགས་སོ་སོའི་རྒན་རབས་དག་གི་དྲུང་ནས་གནའ་བོའི་དབྱངས་རྟ་དང་དམངས་གླུ་སོགས་ཡིག་ཐོག་ལ་ཕབ་པ་དང་།  དེང་རབས་དུས་དར་གླུ་དབྱངས་སོགས་ལ་ཟུར་སྦྱོང་བྱས་པས་སླར་ཡང༼  སེམས་ཀྱི་སྒྲ་དབྱངས ༽ཞེས་པ་དང་།༼  སྤྲོ་དགའི་ལྷན་འཛོམས་༽ཞེས་པའི་ཟེར་སྡེར་གཉིས་སྔ་ཕྱིར་འགྲེམ་སྤེལ་བྱས་པས་དགེ་རྒན་དང་རོལ་དབྱངས་ཆེད་མཁས་པ་སོགས་ཤེས་འཇོན་གཉིས་ལྡན་གྱི་མི་སྣ་མང་པོས་ཁོ་མོའི་དུས་ཐུང་ངུ་རུ་བརྩོན་པའི་འབྲས་བུ་ལ་གདེངས་འཇོག་མཐོན་པོ་གནང་བ་མ་ཟད་མ་འོངས་པར་ཁོ་མོ་བཞུད་དགོས་པའི་གླུ་དབྱངས་སྒྱུ་རྩལ་གྱི་བགྲོད་ལམ་དུ་ཁ་ཚ་དགོས་གཏུག་གི་མན་ངག་དང་མཛུབ་སྟོན་གལ་ཆེན་གནང་།
        ཁོ་མོས་གླུ་གར་སྒྱུ་རྩལ་གྱི་མཁའ་དབྱིངས་སུ་ཅི་དགར་ནམ་འཕང་གཅོད་དགོས་ན་རང་ཉིད་ལ་ད་ཡོད་ཀྱི་ཆུ་ཚད་ཀྱིས་མི་འདང་བ་ཤེས་ནས་སྤྱི་ལོ2006ལོར་པེ་ཅིན་རོལ་དབྱངས་སློབ་ཆེན་དུ་ཞུགས།  སློབ་གླིང་དེ་ག་ནས་བགྲང་བྱ་འགའི་རིང་ལ་སྒྱུ་རྩལ་བ་དང་རོལ་དབྱངས་དགེ་རྒན་གང་མང་བསམ་སྦྱོར་གཉིས་ཀྱིས་བསྟེན་ཏེ་རང་ཉིད་ལ་སྔར་ཡོད་དམངས་ཁྲོད་གླུ་གཞས་ཀྱི་རྨང་གཞིའི་སྟེང་དུ་དེང་རབས་གླུ་དབྱངས་ཀྱི་དབུགས་ཀྱི་གཏོང་ལེན་དང་དབྱངས་ཀྱི་འགུགས་ལུགས་སོགས་ཟུང་དུ་སྦྲེལ་ཏེ་སྐོམ་པས་ཆུ་འདོད་ལྟར་འབད་པ་ལྷུ་རུ་ལེན་པས་གླུ་དབྱངས་སྒྱུ་རྩལ་གྱི་གྲུབ་འབྲས་གཡུར་དུ་སྨིན་པ་ཐོབ་སྟེ་མོ་རང་ཉིད་ཀྱིས་དབྱངས་རྟ་ཆེད་རྩོམ་གྱི་ཆེད་སྒྲིག་ཟེར་སྡེར༼ བོད་པའི་བུ་མོ ༽ཞེས་པ་དང་། ༼ ཁྱེད་ལ་དུང་བའི་སྒྲོལ་མ ༽ཞེས་པ་གཉིས་འགྲེམ་སྤེལ་བྱས་པས་མིང་གི་སྙན་པ་སྔར་ལས་ལྷག་གིས་རྒྱས།  དེ་ནས་ཁོ་མོར་ས་ཕྱོགས་གང་མང་དུ་འཁྲབ་སྟོན་དང་འགྲན་ཞུགས། སློབ་སྦྱོང་སོགས་ཀྱི་གོ་སྐབས་ཐོབ་པས་རྒྱལ་ཡོངས་སྐབས12པའི་ན་གཞོན་གླུ་གར་བརྙན་འཕྲིན་འགྲན་ཚོགས་སུ༼ དམངས་ཚོགས་ཆེས་དགའ་བའི་གླུ་མ ༽ཞེས་པ་དང2007ལོའི་ཟླ་དང་པོར་ཀྲུང་དབྱང་བརྙན་འཕྲིན་ཁང་གི༼ སྐར་འོད་ལམ་ཆེན ༽ཞེས་པའི་འགྲན་ཚོགས་སུ་ཟླ་གཅིག་གི་ཨང་དང་པོའི་གཟེངས་རྟགས་ཐོབ་པ་དང་། ལོ་དེར་ཡུན་ནན་ཞིང་ཆེན་གྲངས་ཉུང་མི་རིགས26གི་མཛངས་མའི་འགྲན་བསྡུར་སྟེང་དུ༼ བོད་ཀྱི་མཛངས་མ ༽ཞེས་པའི་མཚན་སྙན་སོགས་འགྲན་བསྡུར་གྱི་སྟེགས་བུ་གང་མང་ནས་བྱ་དགའ་རབ་དང་རིམ་པ་བླངས།

རྩོམ་སྒྲིག་པ།:万玛措
གཙོ་སྒྲུབ། ཀྲུང་གུང་སེམས་ཀྱི་ཉི་ཟླ་རྫོང་ཨུ། སེམས་ཀྱི་ཉི་ཟླ་རྫོང་མི་དམངས་སྲིད་གཞུང་།
འགན་སྒྲུབ། སེམས་ཀྱི་ཉི་ཟླ་རྫོང་ཨུའི་ཆ་འཕྲིན་ལག་རྩལ་དོ་དམ་ལྟེ་གནས། སེམས་ཀྱི་ཉི་ཟླ་གློག་རྡུལ་སྲིད་དོན་དོ་དམ་ལྟེ་གནས། 0887-8222726
གྲ་སྒྲིག་ཡིག་ཆའི་ཨང་རྟགས། ཡུན་ནནICP ཨང་རྟགས། 13000589
ལག་རྩལ་རྒྱབ་སྐྱོར། ཡུན་ནན་དྲ་བ།